Prabhu Bank Ad

पारदर्शिताको ढोल पिट्ने हिमालय आँखा अस्पतालमा छैनन् सूचना अधिकारी

सराङकोट न्यूज
10 March, 2021 4:58 pm

हिमालय आँखा अस्पताल पोखराको नेतृत्व फेरिएको छ । मेडिकल डाइरेक्टर डा.ईन्द्रमान महर्जनले पदबाट राजीनामा दिएपछि डा. एलिया श्रेष्ठलाई का.मु.एम.डि.तोकिएको छ ।

हिमालय आँखा अस्पताल विभिन्न विवादमा तानिएको बेलामा एम.डि परिवर्तन हुनुलाई सामान्य रुपमा लिइएको छैन । लेखा अधिकृत वामदेव सुवेदी आफ्नै कर्मचारीको उजुरीमा यौन काण्डमा फसेर जेलको चिसो सिडीमा हावा खाइरहेका छन् । उनै लेखा अधिकृतले विरामीको पैसा, क्याम्पको सहयोग प्राप्त रकम आफ्नै खातामा राखेर अपचलन गरेको बारे अस्पतालकै कर्मचारी यूनियनले छानविनको माग ग¥यो छानविनले पनि कैफियत फेला पारेर असुल उपर गराउन लेखेको बुझिएको छ । यस्तै शनिवारिय क्लिनिकमा प्रति टिकट ४ सय रुपैया लिएर एक सयको मात्र विल (टिकट) सेवाग्राहीलाई दिएको र बाँकी ३ सय रकम कहाँ गयो, कसले अपचलन ग¥यो भन्ने बारेमा सञ्चार माध्यम मार्फत खुलासा भएपछि अख्तियारले उक्त प्रकरण छानविनमा चासो देखाएको छ । चश्मा घरबाट भाडा रकम भन्दै मोटो रकम छुट्याएर आम्दानी लुकाउने प्रपञ्च गरेको बारेमा कर्मचारी यूनियनले प्रश्न उठाएको छ । आफ्नै घरको भाडा कहाँ–कसलाई किन छुट्याएको भन्ने बारेमा भुसको आगो जस्तै विषय विवादित बनेको छ ।

यी र यस्ता विवादका बीच एम.डि.डा. ईन्द्रमान महर्जन राजीनामा दिएर बाहिरिएका छन् भने डा.एलिया श्रेष्ठलाई कामू जिम्मेवारी दिइएको छ । आन्तरिक समस्या र जारी विवादका बीच तपाई आँखा अस्पताललाई कसरी सञ्चालन गर्नुहुन्छ भन्ने हाम्रो जिज्ञासामा पहिलो कुरा पारदर्शिता, दोश्रो निस्पक्षता र तेश्रो जवाफदेहिताको आधारलाई केन्द्र मानेर आफू अघि बढ्ने डा.एलिया बताउँछिन् । उनको प्रतिवद्धता सफल हुन्छ या हुन्न त्यो भने केही समय पर्खनु पर्ने हुन्छ ।

सूचना अधिकारी नै छैनन्

नेपालमा सूचनाको हक सम्बन्धी ऐन २०६४ जारी भई कार्यान्वयनमा आएका १३ वर्ष पूरा भइसक्दा पनि कतिपय सार्वजनिक निकायहरु उक्त ऐन कार्यान्वयन गर्न आनाकानी गर्दै आएका छन् । सूचनाको हक सम्बन्धी ऐन कार्यान्वयन गर्दा आफूले गरेका अनियमितता बाहिरिने डरले यो ऐन कार्यान्वयन गर्न आलटाल गर्ने गरेको पाइन्छ ।

हिमालय आँखा अस्पताल पोखरा सार्वजनिक निकाय भएर पनि उसले आज सम्म सूचना अधिकारी तोकेर नियमानुसार राख्नुपर्ने सूचना अधिकारीको सूचना पाटी राखेको छैन । अस्पताल प्रशासनसँग पटक पटक सूचना अधिकारी राख्न अनुरोध गर्दा मुखले हुन्छ भन्ने तर काम भने गरेको छैनन् । सूचना अधिकारी को हुन भन्ने पहिचान नहुँदा सेवाग्राहीलाई हस्पिटलका सेवा प्रवाहबारे जानकारी लगायतका विभिन्न सूचना र जानकारी पाउन कठिन परेको छ । अस्पतालको सेवा बारे जानकारी लिनेदिने फोकल पर्सन नतोकिएको बारे नव नियुक्त कामु एम.डि. एलिया श्रेष्ठले सूचनाको हक सम्बन्धी ऐन कार्यान्वयन र सो बमोजिम सूचना अधिकारी तोक्नुपर्ने बारे अनविज्ञता प्रकट गरिन्।

सूचनाको हक पारदर्शिता र सुशासनको लागि एक विशेष अंग हो । का.मु.एम.डि.डा. एलिया श्रेष्ठले पनि पारदर्शितालाई आफ्नो प्राथमिकता बताएकी छिन् तर सूचना अधिकारी नै तोकिएको छैन । यसले पनि प्रष्ट हुन्छ बोली र व्यवहारको तारतम्य मिलेको छैन। अझ गज्जबको कुरा के छ भने हिमालय आँखा अस्पताल सञ्चालक समिति अध्यक्ष वरिष्ठ अधिवक्ता कृष्ण बहादुर गुरुङ रहेका छन् भने सदस्यमा अधिवक्ता सुरेन्द्र थापा मगर रहेका छन् ।

प्रतिक्रिया दिनुहोस्: