सुचनाको हक सम्बन्धि ऐन कार्यान्वयनमा कास्की जिल्ला प्रसाशनले सक्रियता देखाएको छ । कास्की जिल्लामा रहेका सार्बजनिक निकायहरुलाइ ऐन बमोजिम सुचना अधिकारी तोक्न , मासिक आय ब्यय सार्बजनिक गर्न र हरेक ३/३ महिनामा स्वत प्रकाशन गर्न गत बैशाख ३० गते कास्की जिल्ला अन्तर्गत रहेका ऐनको दफा २ को परिभाषा खण्ड भित्र परेका सबै सार्बजनिक निकायहरूलाई परिपत्र जारी गरि निर्देशन दिइएको थियो ।सुचनाको हकका लागि जिल्ला सन्जाल कास्किको अनुरोधमा कास्की प्रशासनको परिपत्र पस्चात सरकारी र गैरसरकारी तहका सार्बजनिक निकायहरुले ऐन कार्यान्वयनमा सक्रियता देखाएको पाइएको सुचनाको हक जिल्ला अनुगमन समितिका सदस्य सचिब हुलाक निर्देशक किर्तनराज पौडेलले बताए ।
सुचनाको हक सम्बन्धि ऐन कार्यान्वयनका लागि थप सकृयता प्रदान गर्न कास्की प्रशासनले कास्की जिल्लाका कार्यालय प्रमुखहरूलाई एक दिने अभिमुखिकरण कार्यक्रम गरिएको थियो । जेठ ५ गते जिल्ला प्रशासन कार्यालयको सभाहलमा आयोजित अभिमुखिकरण कार्यक्रममा कास्किका ४७ जना कार्यालय प्रमुखहरूको उपस्थिति रहेको थियो ।
अभिमुखिकरण कार्यक्रममा अनुगमन समितिका सदस्य सचिब हुलाक निर्देशक किर्तनराज पौडेलले कार्यपत्र प्रस्तुत गरेका थिए । प्रस्तुत कार्यपत्रमा सरकारी तथा सार्बजनिक निकायहरुले सूचनाको हक कार्यान्वयनमा निर्बाह गर्नुपर्ने भुमिका र दायित्वको बारेमा प्रस्ट्याइएको थियो । अभिमुखिकरण कार्यक्रममा सुचनाको हकका लागि जिल्ला सन्जाल कास्किका अध्यक्ष यदुनाथ बन्जाराले सुशासन र पार्दर्शिताको लागि जारी कानुनको प्रभावकारी कार्यान्वयनका लागि स्वयम्सेवी सूचना अभियनताहरुले सहकार्य गर्दै आएको बताए । कानुन कार्यान्वयनमा कतिपय सार्बजनिक निकायहरुले बेवास्ता गरिदिदा अभियन्ताले राष्ट्रिय सुचना आयोगमा पुनराबेदन गर्न बाध्य हुनुपरेको बताएका थिए । सार्बजनिक निकायले सुचना दिन नखोज्नु र सुचना मागकर्ताले प्राप्त सुचनाको दुरुपयोग गर्नु दुबै दण्डनीय कार्य रहेकोले दुबै पक्ष जिम्मेवार रहनुपर्ने बताउदै कास्की जिल्लालाई देशकै उत्कृष्ट सुचनाको हक मैत्री जिल्ला बनाउन अभियनता र सार्बजनिक निकायको ऐक्यबद्धताको आवश्यकता रहेको सन्जालका अध्यक्ष बन्जाराले बताए ।
कास्कीका प्रमुख जिल्ला अधिकारी टेक बहादुर केसिको अध्यक्षतामा आयोजित कार्यक्रमको सन्चालन सूचना अधिकारी समेत रहेका सहायक प्रमुख जिल्ला अधिकारी गुरुदत्त ढकालले गरेका थिए । सुचना अधिकारी ढकालले कास्कीका सुचना अधिकारीहरुको नियमित बैठक राखी कानुन कार्यान्वयनमा सक्रियता दिदै आएका छन । कार्याक्रममा सहभागीहरुले उठाएका जिज्ञासा र समस्याको जवाफ हुलाक निर्देशक किर्तनराज पौडेल र सुचना अधिकारी गुरुदत्त ढकालले दिएका थिए ।
