सर्वसाधारण नागरिकले गल्ती गरेर राज्यलाई दण्ड जरिवाना तिर्नु सामान्य कुरा हो तर कानून वनाउने तहमा पुगेका जनप्रतिनिधिहरुले नै गल्ती गर्छन् भने त्यसलाई के मान्ने ? यस्तै भएको छ पोखरा महानगरमा ।
पोखरा महानगरका वडा नं. १७ का वडा अध्यक्ष तिर्थराज अधिकारीको कम्पनीले महानगरलाई २५ हजार जरिवाना तिरेको छ । वडा अध्यक्ष अधिकारी समेत रहेको ऐना निर्माण सेवा कम्पनीको ग १ क ३१६० नम्वरको डोजरले रीतपूर्वक अनुमती नलिई वार्ड नं २१ को नाउडी भन्ने स्थानमा उत्खनन् गरेको सम्बन्धमा महानगरले २५ हजार जरिवाना तिराएको हो ।
गत भाद्र २३ गते २१ नं. वडाका वडा अध्यक्ष खगराज आचार्यले उत्खनन् भइरहेको स्थलमा पुगि डोजरको चावी नियन्त्रणमा लिएका थिए । त्यसपछि प्रहरीले डोजर नियन्त्रणमा लिई छोरेपाटनमा राखेको थियो । पक्राउ परेको ९ दिन पछि भाद्र ३१ गते ऐना निर्माण सेवाले जरिवाना तिरेर डोजर छुटाएर लगेको छ ।
वडा अध्यक्ष तिर्थराज अधिकारीले कम्पनीको डोजर अनुमती विना खन्न पठाइएको वारे आफूलाई जानकारी नभएको वताए । कर्मचारीले गल्ती गरेछन् उनले भने । अव त्यस्तो घटना नदोहोरिने पनि उनले प्रतिवद्धता व्यक्त गरे ।
यो प्रकरण एउटा नमूना घटना हो । कानून वनाउने र कार्यान्वयन गर्ने निकायमा आवद्ध व्यक्तिको लगानी रहेको कम्पनीवाटै नियम उल्लंघन हुनु चिन्ताको विषय हो । यसवाट अन्य निकायले सावधानी अपनाउन जरुरी छ । कानून पहिले आफूले मानौ अनि अरुलाई मान्न लगाऔं ।
